Mga kriminal bantayan sa kalagkalag

CEBU, Philippines - Mipahimangno ang kapolisan sa publiko nga magmabinantayon sanglit nangabot na dinhi sa dakbayan sa Sugbu ang mga mangunguot, maniyempohay ug uban pang mga dautang elemento nga nagtinguhang mamiktima atol na sa kalag-kalag.

Kini maoy gipahibalo ni Sr. Insp. Maichael Bastes, ang hepe sa Theft and Robbery Section (TRS) sa Cebu City Police Office (CCPO) tungod sa nadawat nga intelligence reports nga ilang nadawat.

Ang mga grupo gikatahong gikan sa Mindanao, Leyte ug ubang nga silinganang probinsya sa Sugbu nakasulod na dinhi.

 Ang kapolisan mipakatap na hinuon sa ilang mga sakop pagpangita og pag-monitor sa kalihukan sa maong pundok sanglit ang uban kanila duna nay mga warrants of arrests dinhi ug ang uban aron mapugngan sa ilang tinguha nga makabiktima.

Gibutyag niini nga target gyud sa maong mga dautang elemento ang mga dagkong sam-ang pampubliko dinhi sa dakbayan tungod kay magdasok ang mga tawo.

Gipahimangnoan niini ang publiko nga likayan ang pagdala og mahalong butang atol sa ilang pagpanagkot, kinahanglang di maghurot og pangadto sa sam-ang aron may mabilin sa panimalay ug uban pa.

Giawhag usab niini ang publiko nga mo-report gilayon sa kapulisan kini kun duna sila'y mamatikdan nga kadudahan kaayong mga tawo sa ilang dapit aron masusi.

Ang kapolisan nangandam na sa Oplan Kalag-kalag ug nakig-alayon na sa nagkadaiyang sector may kalambigitan sa kaluwasan sa publiko sa maong mga adlaw. – BANAT NEWS