Mga estudyante gidid-ang magbisyo

CEBU, Philippines - Higpit nga gipahimangnoan ni Dr. Carmelita Dulangon ang mga tinun-an sa dakbayan sa Lapulapu sa dili pagsulod sa bisan unsang matang sa bisyo nga naglakip sa paggamit sa illegal nga drugas ug ingon man ang pag-apil sa bisan unsang gang o fraternity.

Si Dr. Dulangon nga maoy division school superintendent sa Department of Education (DepEd) sa maong dakabayan mibutyag niini atubangan sa kaliboan ka mga kabataan nga tinun-an sa nagkadaiyang mga tulunghaang pribado ug publiko sa maong dakbayan atol sa gipasiugdahang kalihokan sa children’s month nga gihimo sa Hope Dome sa barangay Gun-ob niadtong miaging Sabado.

Matud pa niya nga dili siya buot nga adunay moapil sa bisan unsang bisyo sa grupo sa mga batan-ong tinun-an sanglit wala kini ikahatag nga kaayohan ngadto kanila.

“Likaye ninyo ang pag-apil og bisyo sama sa illegal nga drugas o fraternity kay dili kana makahatag ninyo og kaayohan,” ni Dulangon pa sa iyang pamahayag.

Midugang siya nga “kun adunay mosugat kaninyo sa gawas sa eskuwelahan ug moagda sa pag-apil sa ilang grupo ug bisyo, isumbong dayon ninyo sa inyong mga teacher o bisan sa atong mga polis.”

Si Dulangon miingon nga dili siya buot nga adunay usa ka tinun-an sa dakbayan nga iyang mahibaw-ang nagpasakop sa fraternity o sa bisan unsang gang sa mga batan-on nga tinun-an sa dakbayan.

Si Mrs. Paz Radaza nga maoy chairman sa committee on women and children’s protection sa maong dakbayan mipadayag nga naningkamot ang kagamhanan sa pagtabang sa mga tulunghaan.

Dugang pa niya nga ikahimuot kaayo nilang mga opisyal sa kagamhanan kun ang usa ka tinun-an nga makahatag og garbo sa dakbayan sa mga indigay nga ilang pagaapilan nga naglakip sa sayaw, kanta, sa mga indigay sa pasulit ug bisan sa paugnat sa kusog. – BANAT NEWS