Davide di paresaynon ni Tomas

CEBU, Philippines - Walay plano si Cebu City Mayor on-leave Tomas Osmeña nga hulipan si Konsehal Hilario Davide III sa katungdanan sa higayon nga kini moduso na sa iyang resignation letter.

Ang konsehal gitakda nang moluwat sa katungdanan karong semanaha, sa tuyo nga makatutok sa iyang gimbuhaton ngadto sa probinsya.

Kini human usab itudlo si Davide niadtong miaging adlaw isip provincial chairman sa Liberal Party (LP) dinhi sa Sugbu.

Matod ni Osmeña nga daghan pa ang nahabiling mga konsehal sa dakbayan ug dili niya problema ug prayoridad ang paghulip kang Davide.

“Dili kinahanglan og replacement kay naay daghan kaayong mga councilors, para kanako there’s so many councilors already, dili na priority,” sumala ni Osmeña.

Ang pamahayag sa mayor gidasunan usab ni Davide kinsa nipadayag na usab og kaandam pagpapili pagka-gobernador sa lalawigan sa sunod tuig nga eleksyon.

“Not necessary not even urgent, para nako dili priority, 6 months na man lang ang nahabilin unya naa pa may pito ka councilors sa north district nga nahabilin, one councilor less is no big deal, madala ra na nila,” matud ni Davide.

Gipadayag na hinuon ni provincial election supervisor Lionel Marco Castillano nga wala kinahanglana nga moluwat si Davide sa katungdanan.

Giklaro sa election supervisor nga dili babag ang pagkatudlo sa konsehal isip provincial chairman sa LP sa padayong pag-alagad niini sa siyudad.

Apan matud ni Davide nga bug-os na ang iyang desisyon sa pagduso sa iyang resignation letter aron mausa na ang iyang konsentrasyon.

“I will have to resign gyud mao na akong nadisidihan, lisod man gyud kaayo gud nga ari ko mo-concentrate sa province unya magpabilin kong konsehal maglibog unya ba ang atong mga constituents,” dugang pasabot ni Davide.

Gipadayag hinuon sa konsehal nga siya mao gihapon ang mo-preside sa sesyon sa City Council karong Miyerkules isip acting vice mayor.

Nidugang si Davide nga kini na maoy katapusan niyang pagtambong sa sesyon ug iyang gihuna-huna karon ang pagpadangat unya og privilege speech.

Sa pikas bahin mapasigarbuhon si Osmeña sa konsehal tungod kay kini giingong usa sa maayong laki niyang mga konsehal sa dakbayan.

Ang pagkatudlo ni Davide isip provincial chairman sa LP naghatag usab og dalan sa pagsuporta ni Osmeña sa kandidato sa partidong LP pagka-presidente.

Gani gipadayag sa mayor nga siya mohatag og pabor kang Senador Benigno “Noynoy” Aquino nga maoy kandidato sa LP pagka-presidente sa 2010 elections.

Gitataw hinuon ni Osmeña nga iya unang konsultahon ang mga sakop sa Bando Osmeña Pundok Kauswagan (BOPK) padulong sa maong direksyon. – BANAT NEWS