Bus kolektahan gyud og buhis

CEBU, Philippines - Giinsister ni Cebu City Treasurer Ofelia Oliva nga ang kagamhanan sa lalawigan kinahanglang mobayad og buhis tungod sa pag-operate niini sa kontrobersyal nga Cebu South Bus Terminal (CSBT) sa dalan Natalio Bacalso Avenue.

Kini human usab gisalikway sa Kapitolyo ang hangyo sa City Treasurer’s Office (CTO) nga motan-aw sa financial statements sa terminal.

Ang CTO mipadala sa letter of authority ngadto sa kagamhanan sa lalawigan nga nag-awhag sa provincial government pag-andam sa books of accounts niini, samtang gi-schedule ang paghiling sunod semana.

Ang resulta niini mao unya'y basehan sa CTO paghatag og assessment notice ngadto sa Kapitolyo labot sa ilang buluhisan niini.

Apan mibalibad ang Kapitolyo uban sa pagyagyag sa mga rason nganong ang probinsya dili angayang pahamtangan og buhis pagdumala sa terminal.

Usa sa rason sa kagamhanan sa lalawigan mao ang napatik sa Local Government Code nga exempted sa buhis ang mga lokal nga kagamhanan.

Apan gipadayag ni Oliva nga ang probinsya nakakuwarta sa terminal ug nakaganansya niini pinaagi sa pagpaabang og mahal sa mga stalls ug pagkolekta og terminal fees. Nasayran nga ang mga stalls sa CSBT giabangan og P15 mil ngadto sa P110 mil matag buwan.

Wala pay labot niini ang pagkolekta og tag-P5 sa matag pasahero ug P100 usab sa matag bus nga mosulod sa terminal matag adlaw.

Tungod niini, miingon si Oliva nga angayan lang kolektahan og business tax, lessor’s tax ingon man realty tax ang Kapitolyo.

Ang City Treasurer gitakdang makigkita sa mga sakop sa City Legal Office aron tun-an ang himuon nilang lakang subay sa pagbalibad sa Kapitolyo sa ilang tinguha.

Una na hinuong gipadayag ni City Attorney Joseph Bernaldez ug acting Mayor Michael Rama nga kinahanglang mobayad og buhis ang probinsya.

Ang siyudad posibleng mokolekta usab sa 25 porsiyento nga surcharge ug 2 porsiyento nga interes matag buwan sa wala mabayri nga buluhisan sa Kapitolyo pag-operate sa terminal.

Gitataw ni Oliva nga ang tanang establisamento sa dakbayan kinahanglang mokuha og permiso sa City Hall sa dili pa moabli og patigayon. – BANAT NEWS