16-anyos napusilan sa Danao

CEBU, Philippines - Grabeng naangol ang usa ka 16-anyos nga lalaki human kini mabiktima sa pagpamusil samtang nangihi sa miaging gabii duol sa gipasiugdahang disco sa barangay Dunggoan sa dakbayan sa Danao.

Ang biktima mao si Lyle Ivan Gian Gonzales, taga barangay Guinsay sa maong dakbayan human pusila sa wala mailhing lalaki nga dali sab nakasibat pahilayo sa maong dapit.

Si SPO4 Edgar Gomez sa kapolisan sa maong dakbayan nagkanayon nga nagtan-aw og disco ang biktima atol usab sa tinuig nga pangilin sa barangay Dunggoan ug dihang migawas kalit kining gipusil sa maong lalaki duha ka higayon.

Ang biktima naigo sa buko-buko ug liog ug daling gidala sa Danao District Hospital apan gibalhin sa Vicente Sotto Memorial Medical Center sa dakbayan sa Sugbo.  - Romeo Limpangog (BANAT NEWS)