DVMF magsaulog sa anibersaryo

CEBU, Philippines - Saulugon karong adlawa sa Department of Veterinary Medicine and Fisheries (DVMF) sa Cebu City Hall ang ika-36 nga anibersaryo sa katukuran niini.

Dungan usab sa maong okasyon ang pagsaulog sa ika-23 ka tuig nga pagkamugna sa Abattoir Operations Division (AOD) sa City Hall.

“DVMF-AOD Getting Better Each Year Amid the Odds” maoy tema sa nahisgutang selebrasyon karong adlawa.

Ang labaw sa DVMF ug AOD nga si Doctor Alice Utlang mapasigarbuhon sa ilang tema tungod kay matag tuig dunay kalamboan silang nahimo.

Kini sama sa Animal Birth Control Clinic nga ilang gibuksan pipila ka buwan pa lang ang nakalabay nga alang sa mga iring ug iro nga ipakapon ug ipa-ligate.

Matud ni Utlang nga maghatag unya og bulok sa kasaulugan mao ang pagdala diha sa ilang buhatan ni Bogart (tiger) ug ni Mariano (buaya) gikan sa Cebu City Zoo.

Gawas niini miingon si Utlang nga makita usab sa mga tawo ang nagkadaiyang mga serbisyo nga gitanyag sa DVMF sa ilang ibutang nga mga booth.

Nidugang si Utlang nga dunay libreng dental ug medical mission usab nga ilang himuon gawas sa ilang itanyag nga free clinic usab alang sa mga hayop.

Subay niini, gidasig ni Utlang ang mga pet owner sa dakbayan nga moduaw sa ilang buhatan ug mupahimulos sa ilang itanyag nga libreng serbisyo. - Elly Bolonos (BANAT NEWS)