Trabahante gipusil dughan natuhab

CEBU, Philippines - Natuhab ang dughan sa usa ka trabahante sa fast food ning dakbayan sa Sugbo dihang gipareglahan kini og pusil   sa tulo ka mga batan-on didto sa V. Rama Avenue, barangay Guadalupe ning dakbayan sa Sugbo kagahapon sa alas 3:00 pasado sa kaadlawon.

Ang biktima mao  si Archie Narvasa Añana,21, trabahante   sa McDonald nga taga Don Gil Garcia St. barangay Capitol Site, samtang usa sa tulo nga miluthang kaniya nailhan lang nga usa ka Esyot Gamay.

Nasayran nga ang biktima uban sa iyang mga higala nga nagbaklay sa dalan V. Rama dihang kalit lang gihunongan sa usa ka motorsiklo nga giluwanan sa tulo ka batan-on.

Unya usa sa mga angkas sa maong sakyanan ang miluthang sa biktima sa walay igong hinungdan ug dihang natino nila nga samdan ang biktima, mipabulhot dayon kini sa ilang sakyanan ug gibiyaan ang biktima nga nagkadugo.

Gihatod dayon sa iyang mga kauban ngadto sa Vicente Sotto Memorial Center ang biktima samtang gipangita sa kapolisan ang suspetsado uban sa katahap nga usa lang ka paregla ang maong hitabo. - Lesley Caminade (BANAT NEWS)