CEBU, Philippines - Ang mga hepe sa kapolisan sa kalungsoran ning lalawigan sa Sugbo gimandoang patubagon karong semanaha sa hinungdan nganong napakyas sa ilang kampanya batok sa mga ihalas nga armas de fuego.
Kini dihang nasuta sa kadagkoan sa kapolisan sa lalawigan nga wala gyuy bisan usa ka armas nga ilang nasakmit sa ilang area of responsibility.
Sa iyang kapungot, si Sr. Supt. Jesus Gaquing, ang director sa kapulisan sa lalawigan sa Sugbo nagduda nga ang maong mga opisyal sa mga police station , nagmika lang ug puwerting taspokana sa pagpadangat sa impormasyon bahin sa amnesty program sa gobyerno aron sa pag-agni niadtong mga tawo nga ipasurender ang ilang mga armas o kaha ipa-renew ang lisensya niini.
Si Gaquing mibutyag nga mga police station chief nga nagmika mao ang sa mga lungsod sa Alcantara, Alcoy, Boljoon, Santander, Samboan, Malabuyoc, Ginatilan, San Remegio, Tabogon, Borbon, Pilar, Poro, ug San Francisco, Isla sa Camotes.
Hinuon iya pang paminawon ang eksplinasyon sa maong mga opisyal ug sutaon kun naunsang pagka-unsaa nga hinay man ang ilang kampanya sa “kontra boga”.
Sumala pa niya nga hayan inig-katapos sa amnesty program sa gobyerno, iya gyung sugdan dayon ang imbestigasyon sa maong mga police station chief ug ang ipahamtang nga silot kanila magdepende nalang unya sa resulta sa imbestigasyon. - BANAT NEWS