CEBU, Philippines - Gihangop sa Cebu South Mini-Bus Operators Association (CSMBOA) ang bag-o lang naaprubahan nga minibus ordinance sa siyudad sa Sugbu.
Kini bisan pa man kung ang maong ordinansa magdili na sa mga minibus pagsulod sa kontrobersyal nga Cebu South Bus Terminal.
Ang presidente sa CSMBOA nga si Julito Flores nagpasalamat pa kang Konsehal Sylvan Jakosalem nga maoy nangamahan sa nahisgutang ordinansa.
Kini tungod kay ang minibus ordinance sa dakbayan, nagtugot usab sa mga operator pagtukod og kaugalingon niining terminal.
“Wa gyud nay problema, in fact gi-welcome namo na nga ordinansa kay aron makatukod mi og kaugalingong terminal dili na mi mahasol,” matud pang Flores.
Subay niini, pakigtagboan ni Flores ang iyang mga sakop aron pahibaw-on sa ordinansa ug sa samang higayon, sila mangita gilayon og pwesto aron katukuran og terminal.
Nasayran nga gipalabang ni Jakosalem ang nahisgutang ordinansa ug aron maoy solusyon sa panagbangi sa mga sakop sa CSMBOA ug sa kagamhanan sa lalawigan.
Usa ka pagtuon niadtong tuig 2005 hugtanong nirekomendar alang sa paghatag og pagtugot nga dunay matukod nga laing terminal sa habagatang bahin sa siyudad. Nakita sa U.P. National Center for Transportation Studies Foundation nga maoy nihimo sa pagtuon nga nagsugwak na ang publikong mga sakyanan diha sa kasamtangang terminal.
Una nang gipadayag ni Konsehal Jakosalem nga ang minibus ordinance sa siyudad ipatuman gilayon 15 ka adlaw human maaprubahan sa mayor. - Elly Bolonos (BANAT NEWS)