CEBU, Philippines - Duha ang patay ug usa ang kritikal ang kahimtang human magkadinasmagay ang motorsiklo og cargo truck sa highway sa sitio Kanangkaan barangay Perelos lungsod sa Carcar kagahapon sa alas 2:00 sa kaadlawon.
Ang mga namatay mao ang drayber sa motorsiklo nga Honda XRM dunay plaka nga 7D-5522-SP nga si Joseph Gebilaquin, 36, taga Masbate nga kasamtangang nagpuyo sa sitio Catugasan, Perelos ug ang igsuon niini nga angkas nga si Warren Gebilaquin, 32.
Kritikal usab ang kahimtang sa ikatulong angkas nga si Richard Ceniza, 19,ang tulo mga molupyo gihapon sa maong lugar.
Samtang ang drayber sa Isuzu cargo truck nga gikadinasmagay mao si Alberto Olivar, 60,taga barangay Catiad-tiad, Tanjay, Negros Oriental.
Matud pa ni SPO3 Reynaldo Fuentes sa Carcar Police dihang nahinabi sa Banat News ang cargo truck gikan sa siyudad sa Sugbo paingon sa Negros apan pag-abot sa maong lugar gikasugat nila ang motorsiklo ug napunggit kini sa atubangan.
Subay sa imbestigasiyon nalabay ang duha ka angkas atol sa panagdinasmagay samtang ang motorsiklo napasok sa ilawom sa sakyanan ug naguyod apil na ang drayber hinungdan sa pagkaangkon niini og daghang mga samad ug pangos sa kalawasan ug ulo.
Gidali pagdala sa Carcar District Hospital ang mga biktima apan gideklarar nga dead on arrival ang duha samtang gibalhin dayun sa South General Hospital sa siyudad sa Naga si Ceniza tungod sa talandugong kahimtang. – BANAT NEWS