Ka-relasyon sa misis tipi

CEBU, Philippines - Usa ka mag-uuma nga nanugway sa iyang mga kanding gitigbas sa makadaghan hangtod namatay, sa bana sa babayeng minyo nga gituhoang nakarelasyon niini.

Nahitabo kini sa bukirang barangay sa Lumbang, lungsod sa Dalaguete niadtong Lunes sa alas 2 sa hapon.

Wala mahitsura ang nawong ug lawas ni Amador Dianon, 34, ulitawo, molupyo sa barangay Tuba, Dalaguete ug usa ka mag-uuma, human mabulit sa tinigbasan human sa pagpangatake sa bana sa babayeng giingong iyang gikarelasyon.

Ang bana nga napriso human sa hitabo naila nga si Espiritu Entia Belia, 58, minyo ug nanimuyo sa Lumbang.

Subay sa inisyal nga imbestigasyon nila ni PO3 Domino Ravanes ug mga kaubanan, ang suspek nga si Belia daan nang naglungotlungot human makadungog og estorya nga adunay relasyon ang iyang asawa ngadto ni Dianon.

Niadtong Lunes sa hapon wala na makapugong si Belia sa nadunggan niyang estorya hinungdan nga gitigbas niya si Dianon.

Matud sa report wala hunongi og tigbas sa suspek ang biktima gamit ang sanggot hangtod nga nabulit ang kalawasan niini og samad tinigbasan ug sa dihang nalup-og na una pa gibiyaan.

Ang upat ka kuyamoy sa tuong kamot ni Dianon nangaputol tungod sa pagpanagang pagsukol sa suspek, samtang nakaangkon kini og pito ka dagkong samad sa lawas.

Pag-abot sa miresponding mga polis, boluntaryong mitahan sa kapolisan ang suspek ug gitahan usab ang nagkadugo nga sanggot nga maoy iyang gigamit sa pagpatay sa biktima.

Atol sa pagsukitsukit sa kapolisan giangkon niini nga tungod sa iyang kalagot sa pagluib kaniya sa iyang asawa ug sa biktima nawad-an siya sa kabuot hinungdan nga napatay niya ang biktima.

Ang patay’ng lawas sa biktima gitakdang ipaubos sa autopsy ug kasamtangang gihaya sa usa sa mga punerarya sa maong lungsod.

Si SPO2 Francisco Leornas nagkanayon nga ang suspek nga si Belia ug ang asawa niini (ngalan gipugngan) adunay 14 ka mga anak. – BANAT NEWS