CEBU, Philippines - Si Arsobispo Ricardo Cardinal Vidal gipasakaan na og kasong libelo sa kanhi sakop sa Marian Monks of the Eucharistic Adoration (MMEA) sa Lindogon, Sibonga nga si Venancio Cabillon, taga-Ronda, Cebu ngadto sa Provincial Prosecutor’s Office.
Uban sa gikiha ni Cabillon silang Frater Martin Mary nga nailang si Abelio Mangila kinsa maoy superior sa monasteryo ug gituohan nga maoy mipamantala sa matud niya libeloso nga pahibalo nga gitangtang na siya sa organisasyon; Rdo. Padre Marnell Mejia nga editor sa Bag-ong Lungsoranon ug Msgr. Cristobal Garcia nga direktor ug business manager sa pamantalaan.
Sa iyang 14-pahina nga reklamo nga gisumiter sa piskaliya sa lalawigan, si Cabillon nagkanayon nga naulaw kaayo siya sa pagmantala sa “Notice to the Public” nga nagpahibalo sa pagputol sa iyang pagkasakop sa MMEA ug adunay pagtugot ni Cardinal Vidal.
Matud niya nga angay untang isekreto sa monasteryo ang pagputol sa iyang pagka-miyembro, hinungdan nagtuo siya nga malisyoso ang publikasyon.
Apan gitataw niya siya'y nananghid kang Frater Martin nga mobalhin sa Monastery of Our Lady in Marangog, Hilongos, Leyte nga gipadagan gihapon sa MMEA. Kini tungod sa matud dili niya madawat nga mga gipamuhat sulod sa monasteryo sama sa Miss Gay pageant sa mga monghe.
Buot untang mo-uban kaniya ang aspirant nga si Calvin Torres tungod kay wala kini maka-uyon sa mga kalihukan sa monasteryo, apan nahibulong siya nganong gipasanginlan siya og “trafficker of our own members”.
Si Cabillon nagkanayon nga nagduda usab si Frater Martin nga maghimo siya og laing grupo sa mga monghe, apan gipanghimakak kini niya ug miingon nga buot lamang niyang mobalhin sa Leyte.
Nagduda usab siya nga nangayo siya og mga solicitation ngadto sa mga debotos sa Mahal nga Birhen sa Simala gumikan kay adunay boluntaryong nanghatag kaniya og kuwarta aron gamiton sa biyahe. Apan gitataw niya nga wala siya mamugos ug iyang giingnan ang mga nanghatag nga dili kadto alang sa Mahal nga Birhen. Nahimong kontrobersiyal ang Our Lady of the Holy Eucharist Shrine sa Simala human gibutyag ni Cabillon ang giingong panguwarta, overpricing sa mga religious articles ug ang mga law-ay’ng mga buhat sama sa sodomy ug acts of lasciviousness.
Si Cardinal Vidal miawhag unta kang Cabillon nga makig-dayalogo kaniya aron mahibaw-an ang problema, apan nagdumili ang kanhi monghe.
Buot niyang mangayo og pasaylo ang Arsobispo nga gihulagway sa mga relihiyoso nga dili tukma. – BANAT NEWS