CEBU, Philippines - Usa ka menor de edad nga sakop sa Alpa Kappa Rho (AKRHO) misang-at og kaso kagahapon sa buntag batok sa mga sakop sa Tau Gamma Phi kinsa mipusil kaniya ug mikulata sa iyang kauban niadtong Sabado sa gabii didto sa barangay Poblacion, dakbayan sa Talisay.
Ang napusilan mao si Paul John Pateno, 15, ug ang nakulatahan mao si Rameses Piloto, 19, kinsa pulos taga barangay Cansojong sa maong dakbayan ug mga sakop sa AKRHO. Giila ang mga suspetsado nga sila si Eugene Salibay, 19, taga barangay Tanke ug Jason Quiban, 19 taga barangay San Roque nga pulos sakop sa Tau Gamma Phi.
Si Pateno kinsa nasabak sa tuong abaga gikuyogan nila ni Konsehal Rafael Chan Jr. sa Cansojong ug sa uyoan niining si Mario Constantino, hepe sa tanod sa maong barangay ngadto sa Talisay City Police Station sa pagsang-at og kasong kriminal batok sa mga suspetsado.
Ang biktima mibutyag sa Banat News kagahapon sa buntag nga niadtong Sabado sa gabii, nanuroy sila ni Piloto didto sa barangay Poblacion dihang si Salibay kinsa nagsul-ob og t-shirt nga puwa niadtong tungora nga nagsakay og traysikol uban kang Quiban, kalit lang mikulata kang Piloto. Unya wala matagbaw sa pagkulata kang Piloto, milanit kini sa iyang armas ug gition sa iyang tiyan, maayo nalang kay sa ilang paglinayogay, didto mapunting ang bala sa armas sa abaga niya .
Nanagan sila paingon ngadto sa buhatan sa kapolisan nga nagbase sa maong lugar ug dihang gipangita ang mga suspek, nakasibat na kini. - Brenda D. Batuto (BANAT NEWS)