2 gisaka sa balay gipatay

CEBU, Philippines - Gipamusil patay ang duha ka managsilingang mag-uuma sa sulod sa ilang panimalay samtang nanihapon uban sa ilang pamilya niadtong Martes sa gabii didto sa barangay Buenavesta, lungsod sa Carcar.

Ang mga biktima mao sila si Lucino Sabaeta,40 ug Benancio Naveo, 42, pulos mag-uuma, sa nahisgutang lugar, samtang ang kriminal wala hiilhi kay nagbangot kini og panapton sa iyang dagway.

Si SPO3 Jonas Pananganan sa Carcar Police Station nga gikahinabi sa Banat News mibutyag nga nakabsan gyud sa kinabuhi ang mga biktima.

Si Sabaeta nakaangkon ug samad pinusilan sa tuong bahin sa tiyan ug milapos sa buko-buko, samtang si Naveo naigo sa iyang nawong.

Si SPO3 Pananganan nagkanayon nga nagpasaka sa iyang lubi si Sabaeta , ug si Naveo nga maoy mananaka og lubi, iyang gidapit og panihapon sa ilang panimalay.

Apan wala damha sa ilang pagpanihapon uban sa ilang pamilya kalit lang naabot ang usa ka tawong nagtaptap og panapton sa iyang nawong ug gipusil ang tiyan ni Sabaeta.

Si Naveo misuway unta sa pagdasmag sa kriminal aron ilogon ang armas niini apan wala siya’y swerte, kay abtik kaayo ang kriminal nga miluthang sa iyang nawong.

Human mangahagba sa sawog ang mga biktima, misibat dayon ang kriminal ug misakay sa usa ka motorsiklo nga nagpaabot kaniya sa unahan.

Matud pa ni SPO3 Pananganan nga ang motibo bahin sa panagbangi   sa yuta maoy ilang gitan-aw nga usa sa mga hinungdan sa maong krimin.

Ang kapulisan nakapunit og 3 ka mga kabhang sa .45 ka kalibreng armas ,usa ka tingga sa bala , usa ka buhing bala sa .45,ug usa ka bala sa .9mm nga nahibilin sa daplin sa dalan.  - Guam P. Logroño ug Darrel A. Carumba (BANAT NEWS)