CEBU, Philippines - Ipadayon ni Cebu City Mayor on-leave Tomas Osmeña ang pagpanindot sa Cebu City Zoo pinaagi sa pagpakiglambigit niini og pribadong grupo o indibidwal bisan pa man kung gipasidan-an na sa kagamhanan sa lalawigan nga dili ihinayon ang nahisgutang lakang.
Ang pipila ka ektaryang luna sa barangay Kalunasan nga nahimutangan sa nahisgutang pasilidad gikatahong gipanag-iya sa probinsya.
Kini giingong tipik sa luna nga gidonar sa Kapitolyo ngadto sa Boy Scout of the Philippines (BSP) nga nitugot usab sa dakbayan pagdumala sa zoo.
Ang City government pinaagi kang Osmeña buot makig-alayon kang businessman Robert Yopangco alang sa pag-develop sa maong pasilidad.
Apan ang Memorandum of Agreement nga pirmahan unta sa duha ka habig gibasura sa konseho sa siyudad tungod sa nakita niining iregularidad.
Buot sa City Council nga ipaagi sa bidding ang pagpakiglambigit sa kagamhanan sa dakbayan sa laing partido pagpanindot sa zoo.
Apan matud pa sa mayor nga kini dili problema alang kaniya aron matul-id ang agianan paingon sa kalamboan sa nahisgutang pasilidad.
“Okay lang kana alang kanako, ato nang i-bidding, ipadayon gyud nato nang pag-develop sa zoo, nganong dili,” dugang pamahayag ni Osmeña.
Mahimo hinuong makaapil si Yopangco sa ipahigayon nga bidding ug posibling kini gihapon ang modaug alang sa pagpanindot sa zoo.
Kahinumduman nga ang provincial government nipadala og suwat ngadto sa mayor nga nagpasidaan nga dili ihinayon ang plano niini.
Gitubag na ang maong suwat sa probinsya pinaagi ni City Attorney Joseph Bernaldez nga nagsalikway sa pasidaan sa Kapitolyo.
Alang kang Bernaldez, walay katungod nga manghilabot ang probinsya sa himuon sa siyudad tungod kay ang luna niini gihatag na sa BSP.
“Laktod nga pagkasulti ang probinsya ni-donate na man sa luna ngadto sa BSP, so, wala nay interes ang Kapitolyo sa maong luna,” sumala ni Bernaldez.
Ang consultant sa Kapitolyo nga si Attorney Rory Jon Sepulveda nipadayag nga posibling maabot sa korte ang maong issue.
“Dili man mi magkasinabot, there is a logical consequence ani nga standoff, it could be either amicable settlement or we go to court and let the court decide who has the better right to the premises occupied by the Cebu City Zoo, dili na lang ta mangugat og pangaway nila kay we have reached a point nga we become disagreeable,” matud pa ni Sepulveda. (Elly Bolonos) (BANATNEWS)