CEBU, Philippines - Bisan paman sa pagsupak sa mga residente palibot sa Central Command sa barangay Apas ug sa kagamhanan sa dakbayan sa Sugbu, pormal nang gilagdaan ang Memorandum of Agreement sa pagpabalhin niini ngadto sa Mactan Benito Ebuen Air Base sa dakbayan sa Lapulapu ug sa lungsod sa Tuburan kagahapon.
Ang pinirmahay gihimo atol sa gipahigayong General Assembly sa mga Barangay Captains sa tanang siyudad ug lungsod sa lalawigan sa Sugbu diha sa Cebu International Convention Center sa dakbayan sa Mandaue.
Kini gitambungan nila ni Department of National Defense Secretary Guilbert “Gibo” Teodoro Jr.; Cebu Governor Gwendolyn Garcia, Vice Governor Gregorio Sanchez ug CENTCOM Commander Maj. General Isagani Cachuela.
Gilatid sa MOA nga ang tanang maapektuhang estraktura sa kampo diha sa barangay Apas sundugon gihapon paghimo sa susama niining dagway diha sa balhinang luna.
Sa pakighinabi sa Banat News kang Maj. Gen. Cachuela kini mipadayag nga dili sila mobalhin sa MBEAB kung dili pa mahuman ang mga buildings nga ilang balhinan.
Ilaha usab paninguhaong makuha ang luna nga gihatag kanila ubos sa usa ka presidential proclamation gawas sa dul-an 80 ka hektaryang yuta nga apektado sa maong MOA.
Lakip sa balhinan sa ubang gamit sa Centcom mao ang Naval Forces Central sa barangay Canjulao dakbayan sa Lapulapu ilabi na sa unit sa Philippine Navy ug Philippine Marine Corps.
Si Gov. Garcia mipasalig nga andam na ang luna nga balhinan sa Tuburan nga himuong training ground, ang mga tukurong edipisyo sa MBEAB ug Navforcen mao lang ang administration buildings ug ubang mga opisina sa ubang mga units sa militar.
Wala pa hinuon hisguti ang kantidad sa galastuhon sa maong pagbalhin ug wala pa hinuon masuta kun kanus-a gyud sugdan ang pagbalhin. (Bong Soriano ug Romeo Limpangog) (BANATNEWS)