DDB motabang sa taga Benguet

CEBU, Philippines - Si Undersecretary Paul Clarence Oaminal sa Dangerous Drug Board (DDB) mibutyag kagahapon nga andam nga mohatag og hinabang salapi   ang DDB sa mga mag-uuma sa lalawigan sa Benguet nga naapektohan sa baha ug landslide mugna sa bagyong Pepeng.

 Matud pa ni Oaminal nga ang Benguet kaniadto usa sa mga gitumbok nga kapital sa plantasyong marijuana apan tungod sa ilang programa sa pagtabang sa mga mag-uuma, wala nay marijuana ang maong lugar karon ug ang gipalabong didto mao na ang mga abaka ug magay.

 Sa taga lalawigan sa Sugbo si Usec. Oaminal gimandoan usab ni DDB Chairman Vicente”Tito” Sotto III nga papangayuon ang mga mayor sa kalungsorang may plantasyon sa marijuana ug kuwarta kang Gobernador Gwendolyn Garcia ug ang maong request ipahatod usab sa gobernador ngadto sa buhatan sa DDB sa Manila aron kapagawasan dayon kini og salapi nga alang sa panginabuhi sa mga mag-uuma.

 Si Oaminal miingon nga dinhi sa Sugbu, bugtong ang Balamban lamang ang nahatagan nila og pundo alang sa maong programa ug sa pagkakaron dili muminus duha na lamang ka barangay sa maong lungsod ang nagpabiling may marijuana plantation.

 Apan gumikan sa bagyong Pepeng nga migusbat sa umahan ug wala nay kapaingnan ang mga mag-uuma, si Oaminal nagtuo   nga posibling mubalik gayud sa pagpananom og marijuana ang mga mag-uuma sa Benguet. Maoy hinungdan nga matud pa ni Oaminal atol sa interview sa DyRF, nga molihok dayon ang DDB aron sagupon ang mga mag-uuma didto aron dili mobalik ang paghitak sa ilang panginabuhi pinaagi sa pagpananom og ginadiling tanom ilabi na sa taga lungsod sa Quibunga, sa lalawigan sa Benguet nga maoy kanhi marijuana capital sa nasud.

 Gipasabot ni Oaminal nga daghang plantasyon sa marijuana sa maong lugar tungod sa kabugnaw sa maong dapit ug pabor kaayo sa mga mag-uuma gumikan sa kabakiliron niini nga makapatapol sa mga otoridad sa pagsum-ok sa ilang kalibonan. (Chester Abadilla)   (BANATNEWS)