Giluba liog natuhab

CEBU, Philippines - Natuhab ang liog sa usa ka 17 anyos nga lalaki human kini unaya og dunggab sa iyang barkada nga kauban sa inom didto sa barangay Prenza, lungsod sa Balamban kagahapon sa ala 1:40 sa kaadlawon.

Ang biktima mao si Ryan Sabalande, 17 , ulitawo, nga taga Prenza ,samtang ang suspek mao ra usab ang iyang kainom og barkada nga si Michael Minoza, 21, ulitawo, nga iyang silingan.

Si PO2 Cesar Climaco sa Balamban Police mibutyag sa Banat News nga sa wala pa ang pagpanunggab, nag-inom ang biktima ug ang suspetsado didto sa balay sa biktima.

Apan dihang nangalasbag na, naglinalisay na ang duha hangtod nga dihang nahutdan na sa katarungan ang suspetsado uban sa mandar sa alak nga iyang gilala, milanit sa iyang kutsilyo ug gihansak sa walang bahin sa liog sa biktima.

Gihatod dayon ang biktima ngadto sa Vicente Sotto Memorial Medical Center (VSMMC) sa dakbayan sa Sugbo samtang ang suspetsado kinsa misuway unta sa pag-ikyas human makadunggab, nadakpan usab dayon sa kapolisan kagahapon sa buntag ug karon nagpahayahay na siya sa alimuot kaayong prisohan sa Balamban.

Ang mga nakasaksi nagkanayon nga mao kini pago sa mga tawong palahubog kansang bino nga gilala wala isulod sa tiyan apan tua sa utok hinungdan sa pagkayabag niini.   (BANATNEWS)