Puya gibilin sa basurahan sulod sa tugpahanan

CEBU, Philippines - Gituohang pasahero ang tag-iya sa usa ka puyang nakit-an sulod sa pansayan sa Mactan Cebu International Airport sa milabay’ng gabii.

Usa ka Analiza Casayas, sakop sa Mandaue Integrated Manpower Services kon MIMS nga nadestino sa departure area sa MCIA maoy nakakita sa maong puya nga gisulod sa basurahan. Matud pa ni Casayas mga 7:10 sa milabay’ng gabii samtang naglimpiyo siya sulod sa maong pansayan sa departure area sa maong tugpahanan nakabantay siya og mga lama sa dugo sa salog hinungdan nga iya kining gisundan.

Nakurat si Casayas nga sulod sa usa ka basurahan dunay baga nga putos sa tissue ug dihang iyang gitawag ang iyang mga kauban aron susihon usa ka puya ang sulod niini.

Ang puya nga usa ka lalaki gibanabanang lima pa ka bulan, ilahang gidala sa tambalanan apan patay na kini hinungdan nga gidala sa simbahan ug human sa pagbendisyon niini gilubong usab kini sa sam-ang Katoliko sa Humayhumay.

Gituohan sa Police Center for Aviation Security kon PCAS 7 nga usa ka pasahero sa MCIA ang responsable sa maong hitabo ug posible usab nga gituyo ang pagpakuha niini.   (Bong Soriano)    (BANATNEWS)