Car watcher gi-ulo sa pagpusil

CEBU, Philippines - Naulo ang usa ka lalaki nga tigbantay og sakyanan human kini pusila sa wala mailhing mamumuno pasado alas tres kagahapon sa buntag sa dalan Sanciangko sa barangay Kalubihan.

Ang napusilan giila lang sa angga nga “Ryan” usa ka car watcher sa Humabon Park samtang nakigkuyog sa iyang mga higala nga misulod sa usa ka KTV Bar.

Gikatahong kalit lang kining migawas sa wala masayring hinungdan ug samtang diha sa gawas usa ka wala mailhing tawo ang miduol kaniya ug walay daghang pangutana gipusil kini sa iyang ulo ug kamot.

Matud pa sa nakakitang traysikad driver nga natumba na ang bitkima hinungdan nga iya kining gikarga ug gidala sa Cebu City Medical Center.

Samtang ang mamumuno iyang nasigpatan nga mikaratil og dagan paingon sa dalan Pelaez. Ang kapolisan karun padayon pa nga nagasubay kun aduna bay gikalalis o kontra ang biktima nga maoy hinungdan nga mipusil kaniya. – BANAT NEWS