Kongresista gisaway sa konsehal

CEBU, Philippines - Nakaangkon og pagsaway ang pasangil sa usa ka kongresista nga lakip nga mabasol sa dakong baha nga nahitabo sa kauluhan mao ang naghinobrang populasyon sa nasod.

Nagduda si Cebu City Councilor Arsenio Pacaña sa nagpahiping katarungan ni Kongresista Edcel Lagman tungod sa gipamugos niining balaudnon nga Reproductive Health Bill.

Giangkon hinuon ni Pacaña nga dunay kalambigitan ang nagtubo nga populasyon sa Pilipinas apan kini dili angayang han-ukan sa basol.

Kini tungod sa pagtuo sa konsehal nga daghan usab og kakuwangan partikular na ang mga opisyal sa kagamhanan pag-atiman sa kalikupan.

“Daghan man kaayo ta og kakuwangan in terms of taking care of the environment, siguro ang atong funding wa kaayo ma-in place, so, angayan nang hinuktukan,” sumala ni Pacaña.

Ang konsehal nga usa usab ka lay minister nagtuong ang nahitabo sa Luzon maoy resulta sa binuhatan sa tawo ug dili tungod sa nagkadakong populasyon.

“These are man-made dili na siya angayang i-attribute nimo sa population kay nituo baya ta og Ginoo, pasagdan diay ta sa Ginoo tungod kay nidaghan ta,” dugang ni Pacaña.

Tungod niini gisupak sa konsehal ang pamahayag ni Lagman nga ang nahitabo sa kaulohan usa ka ‘eye opener’ aron maaprubahan ang Reproductive Health Bill.

Apan alang kang Pacaña, ang maong kalamidad maoy paagi aron mapukaw ang gobiyerno nga tagdon ang kalikupan.

Gitataw sa konsehal nga dili usa ka dakong issue ang population sa nasod tungod kay giingong daghan pa ang mga dapit sa Pilipinas nga minos og mga tawo.

Kahinumduman nga si Pacaña maoy miduso og resolusyon sa City Council nga nagsupak sa

pagpalabang sa Reproductive Health Bill. (Elly Bolonos)   (BANATNEWS)