Gikan sa tiyan bala lapos buko-buko

CEBU, Philippines - Nabuslot ang tiyan sa balang milapos sa buko-buko sa usa sa duha ka mga trabahante nga gipamusil sa duha ka wala hiilhing armadong mga tawo didto sa barangay Buanoy, lungsod sa Balamban kagahapon sa alas 3:00 sa kaadlawon.

Ang mga biktima mao sila si Wilfredo Manriquez, 22, nga taga Sitio Lower Zegra, sa barangay Buanoy, kinsa maoy gilapsan sa bala gikan sa tiyan ngadto sa iyang buko-buko ug Wilbert Tagalog, 25, taga Sitio Alang-Alang sa Buanoy kansang tuong bitiis gitusak usab sa bala.

 Si PO2 Jose Baldecasa sa Balamban Police Station nga gikahinabi sa Banat News nagkanayon nga ang mga biktima kinsa mga trabahante sa Tsunishi Heavy Industry sa Buanoy, nag-inom sa Lyka KTV atbang sa ilang trabahoan dihang si Tagalog miuna sa pagpauli nga naglakaw.

Apan kalit mibutho ang duha ka tawong nagsakay og motorsiklo nga nag-bonnet ug ang angkas niini maoy nipusil kang Tagalog sa makadaghang higayon apan ang bitiis ra niya maoy naigo ug nakadagan kini.

 Sa pagsibat ni Tagalog si Manriquez na usab maoy gitirahan kinsa maayong pagkasabak sa tiyan ug milapos ang bala sa iyang buko-buko busa diha kini sa talandugong kahimtang sulod sa tambalanan sa pagsuwat ning maong balita.

Si PO2 Baldecasa nagkanayon nga posibleng gisuyaan ang mga biktima sa ilang pagkanta-kanta didto sa KTV ug gipangita na karon sa kapolisan.(BANATNEWS)