4 'nanuyop' nasakpan
CEBU, Philippines - Nasikop sa mga sakop sa Task Force Motorsiklo ang upat ka mga lalaking giingong nanuyop og illegal nga drugas sa usa ka payag sa sitio Soong sa barangay Mactan dakbayan sa Lapulapu sa milabay’ng gabii.
Ang nasikop mao sila si Kim Conde Lim, 23, ug manghod niini nga Michael Bryan, 23, mga higalang sila si Dione Conde Miñon, 36, residente sa sitio Hawaiian sa Marigondon ug Elmer Caga-anan Bellin, 30, residente sa barangay Ylaya lungsod sa Cordova.
Si PO2 Ron Vincent Gaite ang team leader sa Task Force Motorsiklo nag-roving niadtong higayona dihang giduol sa mga residente kabahin sa kadudahang lihok sa upat ka lalaki diha sa maong payag mao ilaha kining gisusi.
Ang upat naaktohang nagsuyop og gidudahang shabu hinungdan nga ilaha kining gipangdakop.
Nakuha sa kapolisan ang tulo ka gagmay’ng putos nga plastic nga dunay lama sa gidudahang shabu ug usa ka gamay’ng plastic sachet duna pay sulod nga gituhoang shabu ug mga kagamitan sa pagsuyop niini.
Kasong kalapasan sa RA 9165 ubos sa Art. 11 Sec. 13 ug 15 ang ipasaka batok sa mga dinakpan. ( Bong Soriano) (BANATNEWS)
- Latest
- Trending
