Money changer gitulis

CEBU, Philippines - Mikabat ngadto sa P150,000 ang nadalang salapi gikan sa usa ka money changer sa duha ka wala mailhing tulisan kinsa kalma kaayong nanakay og jeep pasaheroan paingon sa dakbayan sa Sugbo kagahapon sa buntag diha sa barangay Tabunok,dakbayan sa Talisay.

Ang manag-agaw nga Jesus, 49, ug Romeo Guillen, 50, tagdumala sa Jevi Money Changer sa Tabunok daling mitaho sa mga polis kabahin sa maong hitabo.

Ang mga tulisan gikatahong armado og pusil ug kutsilyo kinsa usa kanila ang gihulagway nga taas og pamarog, tabonon og pamanit, kasarangan ang gidak-on sa lawas nagsul-ob og color maroon nga t-shirt ug camouflage nga shorts samtang ang kauban niini gihulagway nga bus-okon ang panglawas, dunay gitas-ong 5’2, puti og pamanit ug nagsul-ob og color navy blue nga short pants.

Gawas sa salapi nadala usab sa mga tulisan ang usa ka cellphone nga nagkantidad og P3,200.

Sa imbestigasyon sa grupo ni PO3 Mikie Espina sa Talisay City Police Station usa sa mga tulisan ang misulod sa establisamento nga kunohay magpailis og dolyares apan kalit niining gitiunan og pusil ang teller nga si Jurallen Guillen ig-agaw usab nila ni Romeo ug Jesus ug mipahibawo nga tulis ug dayon gipangayo ang kwarta diha sa kaha.

Samtang ang usa ka tulisan kinsa diha sa gawas ang miti-on og kutsilyo ngadto sa gwardiya nga si Anthony Margal kinsa wala magsul-ob og uniporme ug gidala ngadto sa sulod sa establisamento aron walay makabantay nga gitulis nila ang maong money changer.

Si Espina midugang nga dunay nakakita nga ang maong mga tulisan kalma kaayong nanakay og multicab nga pasaheroan paingon sa dakbayan sa Sugbo atol sa ilang pag-ikyas. (Brenda Batuto) (BANATNEWS)