73 ka pamilya gitukora'g balay

CEBU, Philippines - Mikabat sa 73 ka pamilya kinsa naapektohan sa pagtukod sa Cebu South Coastal Road Project (CSRP) ang nakapahimulos karon sa gipatukod nga mga balay sa Aboitiz Land diha sa barangay Biasong, dakbayan sa Talisay.

Kagahapon gipahigayon ang inugurasyon sa 73 ka mga balay kinsa si Kongresista Eduardo Gullas, Mayor Socrates Fernandez uban ni Andoni Aboitiz sa Aboitiz Land ang miputol sa laso ug si Padre Vic Ampalayo, Kura Paruko sa Santa Teresa de Avila Parish sa barangay Poblacion, Talisay ang mi-blessing sa mga balay. Si Mayet Abarquez, hepe sa City Local Housing mibutyag sa mga tigbalita nga mikabat sa 96 ka mga pamilya ang naapektohan sa pagpatukod sa CSRP niadtong tuig 1998 nga naggikan sa barangay Cansojong, San Roque ug San Isidro kinsa pulos nawagtangan sa ilang mga balay.

Ang maong proyekto maoy ika-20 porsyentong kuwang sa housing project sa Aboitiz Land nga ilang gihatag nga benipisyo ngadto sa siyudad sa ilang pag-ugmad diha sa Kishanta Subdivision nga nahimutang sa ibabaw'ng bahin sa barangay Lagtang. Kini usab agi'g pagtuman sa Aboitiz Land sa Akta Republika 7279 kon “an act to provide for a comprehensive and continuing urban development and housing program, establish the mechanism for its implementation, and for other purposes or urban development and housing act of 1992”.

Matud ni Abarquez nga ang siyudad na maoy mopatukod og mga balay niadtong 23 ka mga pamilya diha gihapon sa nahisgutang luna.

Ang maong luna nga gitukoran sa mga balay adunay gilapdon nga mokabat sa 8,000 metro kwadrado nga iya sa Department of Public Works and Highways (DPWH) ug gihatag ngadto sa siyudad isip pagtuman sa hangyo ni Kongresista Gullas ug giaprobahan sa Presidente sa nasud.  – BANAT NEWS