Comelec manira inig 5 pm

CEBU, Philippines - Hangtud lang sa alas 5:00 sa hapon ang gipahigayong continuing registration sa mga buhatan sa Comelec sa dakbayan sa Sugbu.

Kini maoy gitataw sa duha ka election officer sa siyudad taliwa sa bag-ong naaprobahan nga resolusyon nga nag-extend sa working hours sa Comelec.

Ang bag-ong giaprobahan nga Comelec resolution nagmando sa tanang poll offices sa tibuok nasud nga magpabiling bukas hangtod sa alas 7:00 sa gabii.

Gani ang Comelec mitugot sa mga empleyado niini nga motrabaho sa adlaw'ng Sabado ug sa mga holiday aron maatiman ang magparehistro.

Kini samtang nagkaduol na usab ang gitakda nga deadline sa gipahigayong continuing registration karong Oktobre 31.

Apan matud ni City North District Election Officer Attorney Marchel Sarno nga daan na silang mihimo og overtime work bisan wala pa ang resolusyon.

Ang pamahayag ni Sarno gidasunan usab sa iyang kauban nga si City South District Election Officer Attorney Edwin Cadungog.

Matud ni Cadungog nga sa pagsugod pa lang sa continuing registration daan na silang mipasobra sa ilang office hours matag adlaw.

Wala pa hinuon makapaniid ang mga election officer sa siyudad nga nag-anam na pagdaghan ang mga botante sa dakbayan nga gustong magparehistro.

Subay niini padayong nag-awhag sila si Attorney Sarno ug Attorney Cadungog ngadto sa wala pa marehistro nga dili na magpaabot sa deadline. – BANAT NEWS