Mga 'piniriso' naa trabaho sa terminal

CEBU, Philippines - Lain na usab nga pasangil sa mga nag-alburotong mga mini-bus driver ang gibato batok kang Capitol consultant on security matter Byron Garcia labot sa giingong pagpatrabaho og mga piniriso sa Cebu Provincial Detention and Rehabilitation Center (CPDRC) isip porter sa Cebu South Bus Terminal.

Ang mga drayber nagkanayon nga taudtaod na nga nagtrabaho ang lima ka mga piniriso sa CPDRC diha sa South Bus Terminal.

Usa sa gihinganlan sa mireklamong mga drayber mao ang usa ka Larrie Ponce nga taga lungsod sa Borbon ug nag-atubang og kasong pagpanglugos.

Dugang pa sa nang-reklamong mga drayber nga ang maong mga porter wala suweldohi sa Kapitolyo kun dili sa mga pasahero lamang nga magpakarga sa ilang mga kargamento.

Apan ang Provincial Warden sa CPDRC nga si Alito Gabuya dali nga nakadepensa kang Garcia pinaagi sa pag-ingon nga wala sila’y gipagawas nga mga piniriso sa CPDRC aron patrabahoon sa South Bus Terminal.

"Strikto kaayo mi diri sa pagpatuman sa among polisiya, wa gyud miy gipagawas nga piniriso kun walay court order," sigon pa ni Gabuya.

Giangkon ni Gabuya nga si Ponce piniriso sa CPDRC apan nakagawas na kini human maabsuwelto sa korte sa kasong pagpanglugos. – BANAT NEWS