Nagkaon og balot gipatay

CEBU, Philippines - Patay ang usa ka lalaki human kini gipusil samtang nagkaon og balot ug nag-inom inom og beer daplin sa karsada atubangan sa usa ka bakery didto sa Poblacion, lungsod sa Argao niadtong Miyerkules sa alas 11:40 sa gabii.

Ang biktima mao si Antonio Catane Sumampong, 31, lumad nga taga Malangas, Sibugay Province apan kasamtangang nagpuyo sa Media Poblacion, Argao samtang ang suspek mao si Thadeus Saniel, ug usa ka Dondon Saniel, pulos mga molupyo sa nahisgutang lugar.

Matud ni PO1 Arnold Frenal sa Argao Police Station sa dihang nahinabi sa Banat News nga ang biktima nagbarog atubangan sa bakery ug nagkaon og balot samtang nag-inom-inom og beer.

Apan kalit lang miduol ang duha ka suspek ug gisukmag ang biktima ug na-atol nga dihay concerned citizen nga mibadlong apan ang usa ka suspek nga si Thadeus mibunot sa iyang armas nga giluklok sa hawakan nga wala matino ang kalibre dayong pusil sa suspek upat ka higayon.

Ang biktima nga naigo sa iyang ulo ug paa nahagba diha-diha dayon ug gibiyaan sa mga suspek nga nagdaling misibat pahilayo. Daling gidala ang biktima sa Isidro Kintanar Memorial Hospital apan namatay gyud kini paglabay sa pipila ka gutlo samtang giatiman sa mga doktor.

Samtang pagka- Huwebes sa buntag boluntaryong mitahan sa iyang kaugalingon ang suspek nga si Thadeus ngadto kang konsehal Glenn Lucero ug mao na kini mitahan sa kapolisan ug nabalhog na karon ug nag-atubang og tukmang sumbong. – BANAT NEWS