Bus stop sa Natalio Bacalso di hilabtan

CEBU, Philippines - Magpabilin ang bus stop diha sa Natalio Bacalso Avenue sa siyudad sa Sugbu alang sa mga mini-bus nga mopakanaog ug mopasakay sa mga pasahero.

Kini bisan pa man kun gitugotan na sa kagamhanan sa lalawigan ang gihinginlang mga mini-bus nga makasulod diha sa South Bus Terminal.

Matud ni Citom Executive Director Arnel Tancinco nga wala pa siya makadawat og kamanduan nga tangtangon na ang nahisgutang bus stop.

“Wala pa koy instruction nga nadawat bahin ana, wala pa man sab namo na hilabti kay bus stop man na,” nagkanayon si Tancinco.

Gitataw hinuon ni Tancinco nga kun makahukom ang Citom board nga wagtangon na ang maong bus stop, kini ila gilayong tangtangon.

Gipadayag sa presidente sa Cebu South Mini-Bus Operators Association (CSMBOA), Julito Flores, nga dili una sila mogamit sa nahisgutang bus stop.

“Dili una namo gamiton nang bus stop kay 300 meter radius may among gisabutan ni governor nga dili mi mahimong maka pick-up og pasahero,” sumala ni Tancinco.

Ang status quo order ni Gobernador Gwendolyn Garcia giingon ni Flores nga molungtad og usa ka buwan sugod kagahapong adlawa.

Nagkanayon si Flores nga sila mismong mga operator ang mosilot sa ilang mga drayber nga makahimo og kalapasan sa kasabutan.

Kadtong mga drayber nga mopasakay og pasahero sulod sa 300 metros nga radius, pahamtangan unya og pito ka adlaw ngadto sa usa ka buwan nga pagkasuspenso.

Nakontrobersyal ang South Bus Terminal human mangreklamo ang mga sakop sa CSMBOA sa bag-ong patakaran nga gipatuman sa tagdumala niini. Gani kini maoy hinungdan nga nautingkay ang pagpabuhis sa kagamhanang probinsyal sa pag-operate niini sa nahisgutang terminal. – BANAT NEWS