City Hall ug lahug nag ilog

CEBU, Philippines - Nasubli na usab ang panag-ilog pagtaud og basketball board sa mga sakop sa Bando Osmeña Pundok Kauswagan (BOPK) ug ang oposisyon sa siyudad sa Sugbu kagahapong adlawa, susama kini sa nahitabo sa milabay’ng nagsingabot nga election.

Niining higayuna, ang panag-ilog nahitabo diha sa barangay Lahug partikular na sa basketbolan sa Golden Valley Homeowners Association.

Miulbo ang panaglalis tali sa duha ka habig dihang itaud na unta sa gisugo ni City Hall Education Consultant Joy Augustus Young ang gidala niining board.

Apan ang mga panday nga gikan sa City Hall gibabagan sa mga opisyal sa barangay uban sa mga tanod tungod kay ang ilang board maoy gusto nilang itaud niini.

Butang nga nakaaghat ni Young pagtawag og mga sakop sa Mobile Patrol Group aron mopatunga sa diriyot moulbong lamok-lamok.

Nasayran nga ang kapunungan sa mga batan-on diha sa maong dapit nga gipanguluhan ni Reynold Guillen maoy mihangyo sa education consultant sa maong basketball board.

Apan ang presidente sa maong asosasyon nga si Jovito Atillo mihangyo usab og board sa barangay ug nag-abot ang duha ka habig sa basketball court.

Giinsister ni Young nga sila maoy angayang motaud og board tungod kay ang siyudad giingong maoy nidonar sa luna nga gihimong basketbolan.

“Sa siyudad man na nga luna unya kami poy nakauna og dala diri sa among board nganong mobabag man sila?” sumala ni Young.

Apan matud pa ni barangay kapitan Mary Ann delos Santos nga sila maoy nagmentinar sa basketbolan ug sila maoy dunay katungod paghulip sa board niini.

“Bisan og sa siyudad pa na unsa may iyang pangangkonon ana, I feel, it is my right and obligation to do that being the barangay captain of Lahug,” matud pa ni delos Santos.

Ang kapitan didto sa kauluhan kagahapon atol sa pag-inilugay og taud og board apan mimando sa iyang mga sakop nga imuntar ang ilahang basketball board.

Tuod man, nataud gyud ang usa ka board apan sa pagsuwat ning balita kagahapon, wala pa mabutang ang board sa pikas nga habig sa basketbolan, tungod kay nagtigom pa ang mga sakop sa asosasyon alang sa malinawong kasulbaran sa kasungian.

Posible hinuong ang nataud nga board sa barangay atbangan sa board sa pikas nga gidala sa gisugo ni Young nga iya sa kagamhanan sa dakbayan.

Apan matud pa ni barangay konsehal Kenneth Siasar nga sila dili makatugot nga mag-atbang ang board sa basketbolan uban sa pag-insister nga ang ilang gidala maoy mataud niini. – BANAT NEWS