Dalaga patay kay nakuryentihan

CEBU, Philippines - Patay ang usa ka 22-anyos nga dalaga human kini aksidenting nakuryentihan sa naputol nga linya sa CEBECO-3 didto sa sitio Dumlog, barangay Simala, lungsod sa Sibonga niadtong Miyerkules sa alas 12:30 sa udto.

Ang patay nang nahidangat sa tambalanan mao si Renalyn Rentomas, 22, dalaga ug molupyo sa nahigutang lugar.

Matud ni SPO4 Rodelito Carillo sa Sibonga Police Station sa dihang nahinabi sa Banat News nga kalit lang naputol ang wire sa kuryente nga nagsuplay sa kuryente gikan sa poste sa CEBECO paingon sa pinuy-anan ni Lolita Cabeco human natagaki og palwa sa lubi tungod sa kusog nga hangin.

Naatol nga miagi sa maong lugar si Rentomas ug aksidenting nakahikap sa naputol nga linya nga diha sa dalan ug dihadiha nakuryentihan kini.

Ang mga silingan niini nga nakabantay daling mitabang ni Rentomas nga nagkirigkirig ug gihatod sa Deiparine Medical Clinic sa lungsod apan gideklarar sa mga doktor nga dead on arrival. Nanglagom na ang kalawasan ug adunay parte nga nangasunog. – BANAT NEWS