Hangin mobali, pahimangno's Pagasa

CEBU, Philippines - Subling gipahimangnuan sa Philippine Atmospheric Geophysical Astronomical Service Administration (PAGASA) ang mga Sugboanon nga mag-amping kanunay tungod unya sa pagbali sa hanging amihan sugod karong bulan sa Nobiyembre.

Matud ni Vangie Tolentino, weather forecaster sa PAGASA-Mactan sa dihang nahinabi sa Banat News nga dako ang posibilidad nga maigo ang Sugbo kun dunay laing mga bagyo nga mosulod sa Pilipinas ilabi na sa pagbali sa hanging amihan.

Kini tungod kay mopaingon dinhi sa Central Visayas ang hanging amihan ug kun dunay bagyo nga mosulod sa nasud dili gyud kalikayan nga moagi sa Sugbo.

Matud ni Tolentino nga karong bulana mao ang transition period sa hanging habagat diin paingon na kining mobali sugod sa Nobiyembre hangtod sa Marso sunod tuig ug pagka-bulan sa Abril na usab ang transition period sa pagbali niini.

Nunot niini, gipahimangnuan sa PAGASA ang mga molupyo sa Sugbo nga magmabinantayon kanunay ilabi na kun dunay masinati nga dili maayong kahimtang sa panahon.

Sentro sa gipahimangnuan mao kadtong mga molupyo daplin sa baybayon ingon man daplin sa kasapaan nga peligro sa pagdako sa bawod sa dagat ingon man sa mga pagbaha.

Nunot niini, giawhag usab ang mga molupyo nga motabang pagpanalipod sa kinaiyahan sama sa dili pagpataka og labay sa basura nga maoy usa sa hinungdan nga makabara sa drainage nga makamugna og mga pagbaha.

Giluwatan sa mga personnel sa PAGASA Mactan ang maong awhag aron paglikay nga dili mahitabo dinhi sa Sugbo ang nahitabo didto sa Manila nga liboan ka mga pamilya ang gipabakwit sa lainlaing evacuation center human nalubong sa baha ang ilang mga pinuy-anan ug 300 ka mga tawo ang gibiling patay epekto sa pagbaha. – BANAT NEWS