'Balili' version sa Mandaue sayop

CEBU, Philippines - Gipanghimakak sa kampo ni Mayor Jonas Cortes ang gipabutong isyu sa kampo ni Bise Mayor Carlo Pontico Fortuna kabahin sa planong pagpalit og yutang naghumol sa tubig sama sa kontrobersiyal nga Balili property sa Tinaan, dakbayan sa Naga sa Kapitolyo.

Si Atty. Francisco Amit tigpamaba ni Cortes mibutyag sa Banat News nga ang gipabutong isyu ni Fortuna dili tinuod sanglit wala sanapi sa dagat ang luna nga gipanag-iya ni Dennis Lua sa barangay Paknaan sa maong dakbayan.

Matud pa niya nga gitamnan paman gani kini og mais ug adunay bahin niining adunay kalubihan, samtang gihimakak usab niyang ang dakbayan maoy interesadong mopalit niini sanglit gipaubos man kini sa Community Mortgage Program (CMP) sa nasudnong kagamhanan.

Gipasabot ni Amit nga plano ni Cortes nga kapin sa 1,000 ka benepisyaryo gikan sa mga peligrosong dapit sa dakbayan ang papuy-on sa maong luna.

Ang dakbayan nga motagana gyud og financial assistance sa mga i-relocate nga pamilya nga nagbalor og P13 milyones di nalang mohatag niini ug adto nalang kini ihapak isip pasiunang bayad kang Lua aron lang makabalhin dayon ang mga nahisgutang pamilya.

Dugang pa ni Amit nga mismong ang mga i-relocate nga pamilya maoy mipili sa luna ni Lua nga maoy paliton pinaagi sa CMP tungod sa lokasyon niini ug duol usab kini sa lugar sa ilang panginabuhian.

Samtang giklaro usab ni Amit nga limpyo ug wala nay problema sa COA ug sa Malacañang ang ikaduhang gipabutong isyu batok sa mayor kabahin sa mga luhong sakyanan. - Romeo Limpangog (BANAT NEWS)