16-anyos gipusil sa liog

CEBU, Philippines - Talandugon ang kahimtang sa usa ka 16-anyos nga batan-on human pusila duha ka higayon sa iyang paggawas sa diskohan aron unta magtuman sa sugo sa lawas sa barangay Dunggo-an siyudad sa Danao niadtong Miyerkules sa alas 9:20 sa gabii. Ang biktima (ngan gitago) residente sa barangay Guinsay sa samang siyudad samtang ang suspek wala pa mailhi sa kapulisan sa paghimo ning balita. Matud ni SPO4 Edgar Gomez sa Danao City Police nananghid kini sa mga kauban nga mogawas aron pagtuman sa sugo sa lawas. Apan dihang nakagawas kalit kining giduol sa wala mailhing lalaki ug gidiretso pagpusil. Ang biktima gihatud sa Danao District Hospital tungod sa duha ka samad pinusilan sa liog ug bukobuko samtang padayon pa ang pagtumbok sa posibleng motibo sa krimen. - Darrel Carumba ug Romeo Limpangog (BANAT NEWS)