Usa patay, laing angol sa tinigbasay

CEBU, Philippines - Patay ang usa ka tawo ug lain usab ang grabeng naangol sa nahitabong tinigbasay sa managsilingan sa zone Tangkong, barangay Paknaan, dakbayan sa Mandaue alas 9:00 pasado kagahapon sa buntag.

Ang namatay mao si Anthony De Guzman Booc ug ang grabeng naangol mao si Mario Gohel Busque ang duha parehong, 31-anyos ang panuigon pulos minyo ug nagpuyo sa maong dapit.

Si SPO1 Kerwin Bejer sa homicide section sa kapolisan sa maong dakbayan nga nahinabi sa Banat News miingon nga gipabayad si Busque sa manok ni Jimmy Pirater nga natumban niini ug namatay apan si Booc maoy nagpunay og panabi niini ngadto sa ilang mga silingan nga gikasuko ni Busque.

Dihang nagkatagbo ang duha kagahapon sa buntag nahitabo ang sinukmatay nga misangko sa mainiton nilang panaglalis ug nagkasinumbagay.

Matud ni SPO1 Bejer nga human sa maong sinukmagay si Booc mipauli sa ilang balay apan mibalik kini sa maong dapit nga nagdala na og kutsilyo ug sundang ug unang gi-target niini si Busque sa hinagiban nga iyang dala kinsa abtik usab nga nakaikid sa paghupo ug wala maigo.

Mibalik sa iyang agi si Booc ug gigukod kini ni Busque kinsa nagdala usab og sundang ug nagkaharong sa pagtinigbasay.

Si SPO1 Bejer miingon nga nakabaton og samad tinigbasan sa iyang kilid si Booc ug naigo ang atay niini.

Si Booc ang nakabawos usab sa pagtigbas kang Busque hinungdan nga nakaangkon kini og daghang samad sa lawas.

Daling gidala ang duha ngadto sa Mandaue City District Hospital apan si Booc wala na makaabot nga buhi sa maong tambalanan.

Samtang si Busque gibalhin kini ngadto sa Vicente Sotto Memorial Medical Center sa dakbayan sa Sugbo. (BANATNEWS)