CEBU, Philippines - Pamilyang gitumbok nga sinugdanan sa sunog sa Sitio Villa Manga barangay Opao, dakbayan sa Mandaue ang pormal na nga gipasakaan og kaso sa barangay, samtang 46 ka pamilya dili na makabalik sa ilang kanhing gipuy-an.
Gibutyag ni Opao Brgy. Kapitan Jovita "Joy" Ouano sa Banat News nga sa milabay’ng hapon gipasaka sa 145 ka mga residente nga nasunogan sa maong dapit ngadto sa iyang buhatan ang kasong "Reckless Imprudence Resulting to Damage to Property and Homicide, ang banay’ng Soronio nga maoy gitumbok nga didto magsugod ang kalayo sa ilang balay atol sa sunog nga nahitabo sa milabay’ng semana diin usa ang nakalas.
Matud ni Ouano nga ang anak sa napaig nga si Eulalia Ytol nga si Boy Ytol ug igsoon niini nga si Jennifer ug bana sa biktima nga si Willy ang nangusog sa pagpasaka sa maong kaso lakip na ang mga nasunogan pinaagi sa pagpirma sa maong reklamo.
Ang gikihang pamilyang Soronio mao sila si Joel, Mae-mae, Jose Randy, Ruby ug Mary Lyn nga mga residente ug biktima usab sa maong sunog.
Atol sa maong husay gipasabot ni Ouano ngadto sa mga mireklamo nga dili makahusay niini ang barangay gumikan sa gidak-on sa kaso nga gipasaka sa mga biktima batok sa mga Soronio ug kini angayan lamang sa korte dunggon ang maong reklamo.
Apan bisan niini gihatagan gihapon ni Ouano og higayon ang matag habig sa pagpatin-aw sa tinud-anay nga hitabo sa maong sunog sa Villa Manga.
Milangkob lamang sa 45 minutos ang maong husay human nga moinit ang katawhan batok sa mga Soronio diin hugot usab mipanghimakak sa mga pasangil nga tinuyo ang nahitabong sunog sa maong dapit diin gibasol kini ngadto sa ilang pamilya.
Gumikan niini gipaundang ni Ouano ang maong husay ug gisabot usab kini sa mga reklamante ug didto na nila kini ipadayon sa korte diin hugot ang ilang lakang sa pagpasang-at niini batok sa mga Soronio.
Gumikan niini si kap. Ouano mihikling sa pamilyang Soronio sa Opao gym diin kasamtangan nagpasilong alang sa siguridad niini gikan sa mga biktima sa sunog nga nasuko sa maong pamilya.
Samtang 46 ka pamilya nga lakip sa nasunogan dili na makabalik sa ilang yuta nga gitukoran sa ilang panimalay gumikan sa pagdumili sa tag-iya niini nga matukoran og balik ang yuta niini. (Bong Soriano) (BANATNEWS)