Byron mihagit ni Tomas

CEBU, Philippines - Gihagit ni Capitol consultant on security matters Byron Garcia si Mayor Tomas Osmeña nga mopasaka og kaso sa korte kun buot kining mopasira sa Cebu South Bus Terminal tungod kay walay business permit.

Si Garcia nagkanayon nga wala niya hatagi og importansiya ang gipanulti sa mayor sa siyudad ilabi na sa giingong extortion ang pagpangolekta sa P5 nga entrance fee sa mga pasahero.

Si Garcia nagkatawa nga miingon nga ang gibuhiang mga pulong ni Osmeña hayan epekto sa gitumar nga mga tambal sa mayor nga may cancer sa pantog.

Matud pa ni Garcia nga angayan nga modangop ang mayor sa korte aron maklaro kun may kakulangan ba ang probinsiya sa pagdumala sa naasoy nga bus terminal hinungdan nga angayan kining pasirad-an.

Nagtuo si Garcia nga nasuya lamang ang mayor sa pagkamalambuon sa terminal ingon man sa dakong kita niini matag tuig.

Samtang gipahibalo niini nga dili maapektuhan ang operasyon sa terminal bisan og miprotesta ang mga mini-bus operators kay iyang ipadayon ang napatuman sa mga polisiya nunot usab sa pagsuporta sa 80 porsiyento nga mga bus operators nga nakauyon sa mga lagda. Ang mga mini-bus operator nga mireklamo iyang gitambagan nga mangita na lamang kini og laing terminal.

Kagahapon, human sa presidente sa mini-bus operators, laing grupo sa mga operator ang mireklamo batok sa pagdumala ni Garcia sa terminal.

Ang kanhi presidente sa Cebu Provincial Bus Operators Association (CPBOA) Nick Villahermosa mipadayag usab sa iyang reklamo batok sa mga polisiya nga gipatuman sa terminal.

Unang gikwestyon ni Villahermosa ang gipamahalan nga bayranan nga kaniadto tag P60 matag sulod sa bus sa maong terminal nga karon gihimo nang P120.

Gidugang ni Villahermosa nga sa gipatas-an nga bayranan, gipaminusan ang oras nga kutob singko minutos ang pag-estambay sulod sa terminal ug pagpaabot og pasahero. Human sa maong tagal obligadong pabiyahion ang mga bus bisan dili pa daghan ang nakasakay nga mga pasahero.

Laing gikwestyon ni Villahermosa mao ang pagkolekta og P5 nga entance fee sa mga pasahero nga mosulod sa terminal. Alang niya wala na kini kinahanglana tungod kay silang mga bus operators nagbayad na sa terminal.

Gitakdang ipaabot ni Villahermosa ang iyang reklamo atol sa umaabot nga tigum sa bus operators ug aron makahimo sila og lakang batok niini.

Alang niya, nakapasamot og kaminus sa mga pasahero nga mosulod sa terminal ang pagpatuman og entrance fee ilabi na niining nasinati nga krisis. Gipanghinaot niya nga i-review sa Kapitolyo ang gipatuman nga patakaran.

Giklaro ni Villahermosa nga dili siya supak sa tinguha nga himuong world class terminal ang Cebu South Bus Terminal apan gusto usab niya nga dili ipasa ngadto sa mga pasahero ug nilang mga operators ang gastuhan niini.

Samtang si Land Transportation Office (LTO-7) regional director Raul Aguilos nagkanayon nga dili makuwestiyon ang tulo ka sakop sa Civil Security Unit (CSU) nga nanakop sa eskina V. Rama ug Natalio Bacalso Avenue.

Matud ni Aguilos nga mokuwestiyon lamang ang iyang buhatan kun ilegal ang pagpanakop ug ang bugtong silot niini mao lamang ang pagtangtang sa deputation.   (BANATNEWS)