CAIB: Way permit ipagukod

CEBU, Philippines - Giawhag karon sa Cebu City Anti-Indecency Board (CAIB) ang pipila ka buhatan sa City Hall nga museryuso sa ilang kampanya batok sa mga business establishment ilabi na sa mga balay kahilayan sa dakbayan nga walay mga permit. Partikular nga giawhag ni CAIB Chairman Doctor Rene Josef Bullecer mao ang Business Permit Section, Liquor Licensing Division, Office of the Building Official, City Health Department ug ang ubang buhatan nga may kalabotan niini.

Matud ni Bullecer nga kung museryuso lang sa ilang kampanya ang nahisgutang mga buhatan mas mogaan usab ang gimbuhaton sa CAIB.

Gibutyag sa CAIB chairman nga ubay-ubay sa mga night spots sa siyudad ang taud-taud nang nag-operate nga walay business permit.

Kini nasuta ni Bullecer atol usab sa gihimong joint inspection sa CAIB uban sa pipila ka mga buhatan sa City Hall sa nangaging mga buwan.

Gani miingon ang CAIB chairman nga ang nahisgutang mga establisamento maoy sagad mohimo og mga kalapasan sa Anti-Indecency Ordinance sa dakbayan.

Malaumon ang CAIB chairman nga hatagan og pagtagad sa City Hall ang maong problema samtang nagkaduol na ang panahon sa pasko.

Gipaabot ni Bullecer nga modaghan ang moabli nga mga balay kahilayan sa dakbayan sa mosunod nga mga adlaw tungod sa Christmas season.

Lakip sa giawhag sa CAIB chairman nga moseryuso sa maong problema mao mismo ang acting mayor sa siyudad nga si Michael Rama.

Kini samtang ang CAIB giingon ni Bullecer nga padayong mo-assess sa angayan nilang buhaton ug ipatuman sa mosunod nga mga buwan.   (Elly Bolonos)    (BANATNEWS)