Hardware sa Cubacub gitulis

CEBU, Philippines - Gitulis sa duha ka wala hiilhing armadong lalaki ang usa ka hardware sa barangay Cubacub, dakbayan sa Mandaue, niadtong Domingo sa buntag.

Ang gitulis mao ang Kammelle Hardware nga gipanag-iya ni Mrs. Esperanza Tigue nga nagpuyo usab sa maong dapit.

Si PO2 Arnold Villacampo nga nahinabi sa Banat News miingon nga ang biktima kuyog sa duha niya ka mga kawani nga nagbantay sa tindahan niini dihang kalit lang misulod ang duha ka wala hiilhing mga lalaki nga pulos mga batan-on ug yagpison ang panglawas ug   nagpakaaron-ingnon nga kustomer

Apan dihang gipangutana kini sa tindera kun unsay paliton, kalit lang milanit sa gitangkil niining mga armas de fuego ug mideklarar nga tulis.

Gipangayo sa mga suspetsado ang tibuok adlaw nga halin sa maong tindahan nga nagkantidad og P46,400 .

Human makuha ang maong kantidad gikan sa tag-iya sa maong tindahan, ang duha ka tulisan nanirit dayon sakay sa motorsiklo paingon sa barangay Talamban, dakbayan sa Sugbu. (Romeo T. Limpangog)   (BANATNEWS)