Alcover miduaw sa biktima sa sunog

CEBU, Philippines - Gisaulog ni ANAD Partylist Rep. Jun Alcover ang iyang ika 56 nga adlaw’ng natawhan uban sa mga biktima sa sunog sa sitio Villa Manga barangay Opao dakbayan sa Mandaue kagahapon.

Matud pa ni Alcover mas palabihon pa niyang makighugoyhugoy ug mogasto sa mga biktima sa sunog sa maong dapit inay nga iya kining igasto sa mga mahalong restaurant ug mopabongga sa iyang pagsaulog sa iyang adlaw’ng natawhan. Si Opao barangay Kapitan Joy Ouano uban sa mga biktima mitambong sa maong kumbira ug nalipay sa gihimo niining pagpakaon sa mga kabataan ug pagpanghatag og hinabang ngadto sa mga residenteng nasunogan sa Opao gymnasium.

Si kanhi Customs Collector David "Boy" Odilao nga nahinabi sa Banat News maoy usa sa nasurpresa sa gihimo ni Alcover gumikan kay una kining higayon nga makigsalo si Alcover sa mga biktima sa kalamidad.

Nakita ni Odilao nga dili lamang ang kahimtang sa mga walhon nga anaa sa bukid nahisalaag ug mibatok sa gobiyerno ang gilantaw ni Alcover kundili lakip usab ang mga tawong nabiktima sa sunog sa maong barangay.

Nagplano usab si Alcover nga mohatag og hinabang sa mga nabiktima sa bagyong Ondoy ug Pepeng gikan sa iyang pork barrel isip usa ka kongresista.   (Bong Soriano) (BANATNEWS)