... 3 CSU nanakop gidepensahan sa LTO
CEBU, Philippines - Gidepensahan sa Land Transportation Office (LTO-7) ang tulo ka mga sakop sa Civil Security Unit (CSU) nga nadestino sa South Bus Terminal nga nanakop sa mga drayber og mini bus nga nagbiyahean og Dumanjug ug Sibonga sa eskina V. Rama ug Natalio Bacalso Avenue nga hilabihan kalayo sa terminal.
Si LTO-7 regional director Raul Aguilos nagkanayon nga balido ang pagpangdakop sa CSU nga nadestino sa terminal bisan layo na kaayo ang lugar sa terminal.
Matud niya nga ang tulo ka CSU mga deputized sa LTO Central Office.
Gitataw ni Aguilos nga kalapasan sa lagda sa trapiko ang sentro sa pagpanakop sa mga sakop sa CSU niadtong Sabado.
Si Aguilos miingon nga 10 ang gi-request sa Kapitolyo nga ma-deputized sa LTO, apan tulo lamang ang giaprobahan ni LTO Assistant Secretary Arturo Lomibao.
“Deputized na sila, tulo ra sila kabuok ang deputized agent nga CSU kay napulo mana sila ang gi-endosar sa Kapitolyo, valid ilang dakop,” matud ni Aguilos.
Iyang giklaro nga bag-o ra’ng nabalik ang mga deputized agent sa LTO apan gipili na ang maka-isyu og Temporary Operators Permit (TOP).
Niadtong Agosto 6 ning tuiga gitangtangan og katungod ang tanang deputized agent sa LTO lukop nasud human makadawat og reklamo nga kusog manguwarta ug mga abusado ang mga deputized agent sa LTO, ilabi na ang mga sakop sa Task Force Alpha. (BANATNEWS)
- Latest
- Trending
