Amnesty program sa loose firearms dad-on barangay

CEBU, Philippines - Kapulisan sa dakbayan sa Sugbu magsuroy-suroy sugod karong semanaha sa nagkadaiyang barangay dinhi sa dakbayan alang sa ilang kampanya sa amnesty program sa gobiyerno labot na sa mga loose firearms.

Matud pa ni Sr. Supt. Patrocinio Comendador, director sa kapulisan sa dakbayan sa Sugbu nga duna siya’y mga mobile outposts nga ipa-roving matag adlaw sa nagkadaiyang barangay nga manawagan sa mga tawong dunay mga armas nga wala pay lisensya o ba kaha buot nilang i-surrender.

Gibutyag niini nga ila unyang ibutang og schedule ang mga barangay nga duawon sa ilang mga mobile outposts aron sayon nalang unya kaayo pag-deposito sa mga armas nga buot nang i-surrender nga wala nay hasol ug uban pang mga pangutana.

“Wala na sila’y laing himuon kun duna sila’y mga armas nga walay lisensya ilang ihatag sa mga police nga nisuroy sa barangay ug wala na sila’y daghang kwestyon basta ila lang ma-turn-over,” sumala pa ni Comendador.

Nasayran nga ang amnesty program sa gobiyerno gisugdan kini niadtong Oktubre 1 ug mapupos karong 31 ning buwana paghatag og kahigayonan niadtong dunay mga wala ma-renew lisensyang armas sa pag-renew niini o ba kaha kun di na sila interesadong maghupot niini itahan nalang sa kapulisan. Ang maong kampanya kabahin kini sa pagpangandam sa gobiyerno sa umaabot nga National Election karong 2010.   (Guam Logroño)   (BANATNEWS)