Imbestigasyon sa simala gisugdan na - Cardinal

CEBU, Philippines - Gisugdan na ang imbestigasyon sa Artsidiyosises sa Sugbu ang kontrobersya ug reklamo sa usa ka kanhi monghe sa Simbahan sa Lindogon sa Simala sumala pang Cebu Archbishop Ricardo Cardinal Vidal.

Si Vidal sa report sa Balitang Bisdak kagahapon nagdumili paghatag sa detalye sa dagan na karon sa imbestigasyon sa lima ka mga sakop sa investigating team nga gilangkuban sa kaparian ug layko.

Matud pang Vidal ang resulta unya sa ilang imbestigasyon maoy iyang basehan sa iyang rekomendasyon samtang padayon ang panawagan ni Vidal kang Frater Paul Mary kon Venancio Cabillon ug duha ka kauban sa pagduol kaniya.

“Later on they will report it to me and from that report I will make my decision,” matud pa sa Arsobispo.

Si Vidal nagkanayon nga nagpaabot pa gihapon siya sa mga mireklamong monghe nga moduol kaniya ug andam siyang maminaw sa ilang reklamo.

Si Cabillon ug kaubang monghe ug ang doktor sa mga monghe sa Lindogon mipasangil nga dunay mga malaw-ay'ng nanghitabo diha sa maong simbahan ug pagpangwartang gipanghimo sa mga monghe ug pagpakawalay pakabana sa mga pangaliya sa mga debotos.

Ang grupo ni Cabillon mipahibalong modangop sa korte aron pagpasaka og kasong libelo kang Vidal ug kaparian sa simbahan gumikan sa pagpublikar kaniya sa iyang pagkatangtang sa kahugpungan sa mga monghe sa Lindogon lakip na ang mga pasangil diha kaniya nga nakaingon sa iyang pagkataktak. (BANATNEWS)