Gipusil sa apapangig, ngipon napupo

CEBU, Philippines - Nalandig sa tambalanan ang usa ka 40-anyos nga lalaki human kini tabangi og pamusil sa duha ka wala mailhing mga tawo kagahapon sa hapon sulod sa balay sa biktima sa P. Labuca Street, barangay Cansojong, dakbayan sa Talisay.

Ang biktima giilang si Noel Reynes Cabrera, nakaangkon og samad pinusilan sa tuong bahin sa iyang apapangig ug natangtangan og usa ka ngipon ug napusilan sa ubos nga bahin sa tuong suso gidala sa Talisay City District Hospital apan tungod sa iyang kahimtang gibalhin ngadto sa Chong Hua Hospital.

Sila si PO3 Ferdinand Pablo, PO3 Mikie Espina ug PO2 Estephen Sefuesca ang daling mialarma sa maong insidente kinsa mitug-an sa Banat News nga si Cabrera ug mga anak nga babaye nagtan-aw og TV dihang nanulod ang mga mamumuno.

Gikatahong nagpayongyong sa kalo ug ang kauban nagtabon og panyo sa nawong ang duha ug dayong pusil kang Cabrera, usa sa mga mamumuno nga motiwas unta sa biktima napakyas kay mikagar ang armas ug natagak ang safety lock sa tambor sa rebolber nga gituuhang paltik.

Nakuha sa mga polis sa lugar ang usa ka ngipon sa bag-ang sa biktima ug ang piyesa sa tambor sa maong armas nga gituuhang gikan sa rebolber. – BANAT NEWS