Gitulis ug gipuspusan namatay

CEBU, Philippines - Gituohang gitulis pagkahuman gipatay ang usa ka lalaking nakit-ang wala nay kinabuhi sa kalibunang bahin sa barangay Tajao lungsod sa Pinamungajan niadtong Biyernes sa alas 11:45 sa buntag. Ang biktima mao si Martin Delfin Quijo, 35, molupyo sa nahisgutang lugar, samtang ang suspek o mga suspek wala pa gyud mailhi sa kapulisan sa paghimo ning balita.

Si SPO2 Allan Tundag mao nay nagpahibawo sa iyang mga kaubanan kabahin sa patay'ng lawas nga nabangalan sa kalibunan sa usa ka mangangahoy.

Dihang gihiling sa municipal health officer nga si Shiela Faciol patay na gyud kini.

Subay sa imbestigasyon, ang biktima patay nang nagbuy-od sa kalibunan nga dunay dakung samad ug mga bun-og sa ulo nga maoy gituohang hinungdan sa kamatayon niini.

Sa dugang pakisusi sa kapulisan sa crime scene gituohan niini nga gitulis ang biktima ug pagkahuman una pa gipatay tungod kay gidudahang duna kini dalang kwarta base usab sa pangangkon sa mga kabanay niini. Apan dihang gihiling walay kwartang nakita diha sa patay'ng lawas, sumala pa sa mga kabanay niini nga anha niya taguon sa iyang baksanan ang salapi kun kini molakaw. – BANAT NEWS