Aber Belleza subling modagan pagka-opisyal sa dakbayan

CEBU, Philippines - Kanhi bise mayor Aberdovey Belleza sa dakbayan sa Talisay ang mikompirma nga dunay posibilidad nga modagan siya karong umaabot nga eleksiyon sa tuig 2010 apan wala niini ibutyag ang posisyon nga daganan.

Si Belleza nga nahinabi sa mga tigbalita kagahapon nagkanayon nga duna siya’y planong motabang sa Talisay posibleng isip usa ka pribadong tawo o Talisaynon o mobalik siya sa arena sa politika.

Kahinumduman nga sa milabay’ng eleksiyon sa tuig 2007 si Belleza ang napildi sa bise mayor karon nga si Lani Abarquez.

Ang asawa niining si konsehal Shirley Belleza kinsa last termer gikatahong modagan isip bise mayor sa Talisay.

“Bisan kinsa akong suportahan basta maayo og mga plano ug panglantaw alang sa kaayohan sa Talisay, dili ka nang plinastik kanang igo lang motungtong sa entablado unya human mosulti nga mao nay buhaton unya inig ka daog dili na nato makit-an sa karsada makit-an lang nato inig eleksiyon,” ni Belleza pa.

Midugang kini nga 101 porsyento ang iyang planong modagan sa pagbalik karong umaabot nga eleksiyon sa tuig 2010 apan wala niya ibutyag kung unsa nga posisyon ang iyang daganan ug sama niadto modagan siya isip independente nga kandidato.

“Like what I did in 2004 wa ko’y angay nga kabalak-an kay I know how to take care of myself and if ever I decide to run, I see to it that I am financially capable to finance my own candidacy,” ni Belleza pa.

Subay niini, si Konsehal Sabeniano Abatayo kinsa last term na usab isip konsehal sa siyudad karong tuiga mibutyag ngadto sa mga tigbalita nga wala siya’y planong modagan sa taas pa nga posisyon sa umaabot nga eleksiyon ug kontento na lang siyang mahatagan og posisyon isip consultant diha sa city hall. (Brenda Batuto)   .   (BANATNEWS)