Minero gipuspusan patay, kapuyo 'angol

CEBU, Philippines - Namatay ang usa ka minero human gibunal-bunalan ang ulo ug kalawasan og binughang kahoy sa laing minero niadtong milabay’ng gabii sa sitio Canlawilao barangay Dumalan lungsud sa Dalaguete.

Wala na madala sa tambalanan ang biktimang si Loreto Decano kapin sa 40-anyos, minero sa Ibalong Miners Resource Inc. taga sitio Maanto sa nahisgutang lugar samtang ang suspetsado mao si Danny Pantinople kapin sa 30 anyos ug kanhi nabilanggo sa Cebu Provincial Detention and Rehabilitation Center (CPDRC) gumikan sa kasong murder apan gi-abswelto sa korte.

Si SPO1 Cleto Pia, imbestigador sa Dalaguete Police Station nga gikahinabi sa Banat News nagkanayon nga padulong nang pauli ang biktima gikan sa iyang gitrabahuan nga minahan.

Nagkuyog ang biktima ug kapuyong si Lucia Antero nga nag-inom sa usa ka tindahan uban sa mga higalang babaye ug nakadesider nga mamauli.

Apan sa ilang pagtalikod pipila lang ka lakang kalit silang gibunal-bunalan sa ilang likod og binugha sa suspetsadong si Pantinople hinungdan nga nasukarap ang biktima ug nalup-og sa yuta.

Ang kapuyo nga si Lucia nitabang unta apan mao na say gibunal-bunalan sa akusado hinungdan nga nakaangkon usab kini’g mga bun-og sa iyang bukton, tuhod ug buko-buko apan wala gihapon matagbaw gibunalan pa gayud ang ulo sa biktima.

Human sa pagpamunal daling nisibat ang akusado palayo sa dapit pag-abot sa mga miresponding police, ang biktima patay na ug ang kahoy nga gigamit pagpuspos nakuha sa kapulisan.

Si SPO1 Pia nagkanayon nga ila karong gitan-aw ang posibilidad ang motibo sa love triangle kay posibleng naibog ang suspetsado sa kapuyo sa biktima nga asawa sa amigo sa suspetsado nga usa usab ka ex-convict nga nagminyo usab og lain.

Ang akusado nabilanggo kaniadto gumikan sa kasong murder pipila na ka tuig ang nilabay ug gi-abswelto kini sa korte.   .   (BANATNEWS)