60-anyos gitagod og tigbas sa pag-umangkon

CEBU, Philippines - Patay diha-diha ang usa ka 60-anyos nga mag-uuma human kini gitigbas makadaghang higayon sa iyang kaugalingong pag-umangkon sa barangay Cagay lungsod sa Barili niadtong Huwebes sa alas 5:00 sa buntag.

Ang biktima mao si Felix Mañacap, 60, nagpuyo sa maong lugar samtang ang suspek mao ang iyang kaugalingong pag-umangkon nga si Randy Tenubroso, 26, silingan ra sa biktima.

Matud ni SPO2 Zaldy Orello sa Barili Police dihang nahinabi sa Banat News hubog kaayo niadtong tungura ang biktima ug miadto sa balay sa suspek ug nanghagis sa inahan sa suspek nga iyahang igsuon.

Kini hinungdan nga gikanaog sa suspek ug gikomprontase nga niresulta sa ilang panaglalis hangtud nga nipauli ang biktima.

Apan wala dangti og dugay mibalik ang biktima nga nagdala na og sundang ug dihang nigawas ang suspek gitigbas kini dayun sa biktima apan tungod sa kahubog natapi sa suspek ug nailogan sa gibitbit nga sundang ug maoy giunay og tigbas ngadto kaniya makadaghang higayon.

Ang biktima nakaangkon og daghang samad tinigbasan sa ulo, tiyan ug mga kamot ug maoy hinungdan sa pagkamatay niini diha diha nga wala na madala pa sa tambalanan.

Samtang ang suspek boluntaryo sab dayung mitahan sa iyang kaugalingon sa kapulisan ug nagtingkagol na sa detention cell samtang nagpaabot sa tukmang sumbong nga ipasaka.

Matud pa ni SPO2 Orello napungot ang suspek sa pagpanghagis sa uyoan ngadto sa iyang inahang masakiton hinungdan nga iyaha kining gitigbas makadaghang higayun human usab siya maoy unang gitinguha nga patyon. (BANATNEWS)