Liquor ord. ipatuman

CEBU, Philippines - Gipatawag ni Cebu City Acting Mayor Michael Rama ang kapulisan sa dakbayan kagahapong adlawa alang sa usa ka command conference.

Kini human usab madawat ni Rama ang notisya sa lugway labot sa gi-file nga leave of absence ni Mayor Tomas Osmeña sulod sa 30 ka adlaw.

Buot sa acting mayor nga ipatuman sa kapulisan ang foot patrol, police visibility sa kadalanan, ug ang estriktong pagpatuman sa mga ordinansa sa dakbayan.

Partikular na niini ang liquor ordinance nga nagdili pagbaligya sa ilimnong makahubog ngadto sa nagpangedaron og 21-anyos paubos.

Apan ang gusto ni Rama nga lutuson sa kapulisan mao lang ang mga tindahan nga maoy nagbaligya og ilimnong makahubog ug dili ang mamalit nga mga batan-on.

Gusto usab sa acting mayor nga ipahipos sa mga polis ang mga batan-on nga maoy tighugaw-hugaw sa mga pader daplin sa kadalanan.

Labaw sa tanan, ang pagsikop niadtong magpataka lang og labay sa ilang mga basura nga usa usab ka kalapasan sa laing ordinansa sa siyudad. (Elly Bolonos)   (BANATNEWS)