CEBU, Philippines - Gumikan sa bagyong Pepeng nga miigo sa nasud sugod karong buntaga sa Luzon, ang Regional Disaster Coordinating Council (RDCC)-7 mipasidaan sa mga residente nga nagpuyo daplin sa sapa sa tibuok Central Visayas ilabina dinhi sa Sugbu nga manigurong mobalhin og mas luwas nga dapit aron likayan ang katalagman dala sa baha ug landslide.
Lakip sa gipasidan-an mao kadtong mga mananagat nga magsakay lamang og gagmay’ng bangka nga dili lang una managat karun ug ugmang adlawa. Si Neil Sanchez, information officer sa RDCC-7 nga nahinabi sa Banat News nagkanayon posibleng iisa sa Pag-asa Mactan ang storm signal no. 4 tungod sa gikusgon sa hangin nga 190 kph dala sa bagyong Pepeng.
Matud ni Sanchez base sa iyang nahinumduman nga ang bagyong Rufing kaniadtong 1990’s nga miigo dinhi sa nasud giisa ngadto sa storm signal no. 4 kun super typhoon hinungdan nga apektado ang tibuok Central Visayas ilabina sa Sugbu.
Nitataw si Sanchez nga wala hinuon maapil sa storm signal ang Sugbu sa bagyong Pepeng apan angayan lang magmabinantayon ang mga Sugbuanon tungod sa pag-uwan ug pagbaha.
Gibantayan sa RDCC-7 ang mga lugar sa Camotes island, Bantayan island ug sa kinatibuk-ang Northern Cebu.
Niadtong Miyerkules, gimando ni PRO-7 chief Supt. Lani-O Nerez nga maoy chairman sa RDCC sa tanang hepe sa kalungsoran ug siyudad sa tibuok rehiyon nga makig-alayon sa Local Disaster Coordinating Council alang sa ilang pagpangandam sa maong Pepeng. Samtang gibutyag ni Sanchez nga nagpadayon ang ilang pagpanawat og relief goods alang sa mga biktima sa bagyong Ondoy didto sa Metro Manila. (Rey Pasaporte)
(BANATNEWS)